Kalender Jawa

Para sutresno, kalender utawa penanggalan, anduweni peran sing penting ing sajroning pasrawungan jembar. Suku utawa bangsa Jawa, uga duwe kalender dhewe, sing sinebut Kalender Jawa, asring uga disebut Kalender Sultan Agungan.
Kalender Jawa iki, migunaake petung rembulan utawa candra. Petungan ini padha karo kang digunaake kalender hijriyyah. Ananging beda karo kalender masehi kang migunaake petungan srengenge utawa surya.
Ing antarane Kalender Jawa lan Kalender Hijriyyah sajatine tetep ana bedane. Kalender Hijriyyah migunaake prastawa Hijrah kang dileksanaake Kangjeng Nabi Muhammad SAW kanggo pathokan wiwitan.
Kalender Jawa, ing setahun umure 354 3/8 dina, dene Kalender Hijriyyah umure 354 11/30 dina. Utawa, saben wolung tahun, Kalender Jawa ana telung tahun kabisat, dene Kalnder Hijriyyah saben 30 tahun ana 11 tahun kabisat. Tahun Kabisat iku umure 355 dina.
Tahun Kabisat ing Kalender Jawa itu tiba ing tahun Ehe, Je lan Jimakir. Ing Tahun Kabisat iku, umure sasi Besar 30 dina. Nanging ing tahun ora kabisat, umure 29 dina.